「Charles，你負責這一單，差佬叫我地個客協助調查，人口失蹤，佢話想搵律師陪，你搵個大狀陪佢吧。」大狀、客人依約到齊，一行人進入西九總部。
客人話同失蹤者係多年死黨，對上一次聯絡係半個月前的事，成班朋友約埋上去失蹤者屋企鋤 Dee 打邊爐；失蹤者父母個幾星期前開始打極電話都搵唔到個仔，上佢公司發現佢已經冇返個幾星期工，公司正準備出信炒佢；開鎖匙上佢屋企，發現成地花生殼、啤酒樽、玻璃碎，但係阿仔的所有衣服、行李，甚至連阿仔部手機都仍然在屋企，覺得有可疑，於是報警，報警前亦有通知佢的朋友，包括我地個客。
阿蛇問︰打完邊爐之後，你仲有冇見過失蹤者？經大狀建議，客人決定話「我冇嘢講」；阿蛇進一步問︰我地知道，你其實有聯絡過失蹤者，幾時？傾過乜？客人入警署之前已經指示過，關於電話、whatsapp 或者電郵，因為牽涉其他私隱嘢，佢唔想畀警察知，客人亦繼續話「唔想講」。簽完口供，走得。
兩日後，長假期前夕，基層工人基本毫無工作意欲，點知客人打來話，警察又要求佢協助調查，不過今次，係重案。原班人馬再次抵達西九總部。
問過入境處，冇失蹤者出境紀錄；阿蛇話，「我地已經知道你曾經同失蹤者仲有其他人 whatsapp 左成晚，仲不歡而散；我仲知你條仆街搞人地阿嫂添，係咪呀，Fredi？」
基層工人同大狀都不由得倒抽一口涼氣 …… 我心諗︰Fredi？搞阿嫂？唔係去新金莎係嘛？大狀鎮定過來後，就要求畀客人單獨同律師傾先；客人反而話︰唔駛，我 ok，總之我冇犯過法，而家我冇嘢要瞞，繼續啦。
的確，眼前呢位客人，就係 Fredi；而失蹤者，不是別人，正是 King，即是「洗左（套西裝）luuu」的洩密者。之後的對答，基本就係阿蛇不斷推敲案情，包括 Fredi 是咪因為 King 將佢同準新娘 Kathy 的醜事公告天下而懷恨在心，已經殺死 King；Fredi 除左對一些太離譜的推斷（「你係咪叫埋 Patrick 幫手肢解左佢喇」）忍唔住回一句「黐線」之外，絕大部分情況都按照大狀的建議表示「我冇嘢講」。
一個上午之後，重案亦無計可施，因為其實連 King 係咪真係死左都冇證據證明，所以又係只能夠放佢走，加多句「我地會保留起訴權利」。
就基層工人同大狀來講，由於 Fredi 一開始已經指示，佢真係一直冇見過阿 King，我地亦冇必要深究佢到底係咪真係知道佢下落（甚至殺左佢）；不過，慎重起見，我地都建議同 Fredi 開次會，佢亦同意，所以就上左 chambers 傾多陣。
Fredi 話，那個成為城中熱話的 whatsapp 討論，其實就係發生在打邊爐之後的一晚；正是在鋤 Dee 烚下烚下時，Simon 撩起大家來個 single party，Patrick 又覺得 Kathy 可以叫姊妹去旅行佢都要玩番夠本，所以大家才在兄弟姐妹團 whatsapp 中講起，點知一發不可收拾。
Fredi 強調，佢冇做過任何傷天害理、害阿 King 的事，whatsapp 鬧完之後，婚禮都已經告吹，成班兄弟根本冇心情再見面或者玩，而佢自己當然更冇面見班朋友，所以佢真係完全冇再見過 King，更莫講話會知佢去左邊；至於佢同 Kathy 之間的事，佢覺得同件案冇關，佢唔想提，而大狀同基層工人都覺得，我地冇需要知。會面就此作罷。
放完長假回來，Fredi 在假期中 send 來電郵，話已經搵返阿 King，要求我地協助銷案。我地當然要先見一見 King，了解事情的來龍去脈。
原來，whatsapp 大鬧，除了當事人喜事辦不成，另一位傷心人，就係 King，佢本來想趁幫手婚禮的機會，接近暗戀多年的 Panny，甚至希望有機會表白。婚禮取消，King 亦感到無奈，佢一度鼓起勇氣，想約會 Panny 正式展開攻勢。只可惜，由於冇標準工時，要問阿姐拎假都好煩的 Panny，甚至連相睇晚飯的時間都冇。King 多次相約未能成事，自忖係咪太差所以食檸檬，在家中醉酒吃花生消愁，萬念俱灰，認定係 Kathy 劈腿壞佢好事，所以將 whatsapp 吵鬧內容公諸於世，繼而連電話都唔帶，就離家避世去了。
離家期間，某一晚佢落到赫德道酒吧買醉，聽見其他酒客興奮談論 Kathy 與 Patrick 之事，先知道已經鬧得滿城風雨，心想與其頹廢度日，不如搵事件的始作俑者，問個明白；就係 Fredi 離開重案當晚深宵，King 摸上 Fredi 屋企，Fredi 起初連門都唔敢應，後來確認佢的確尚在陽間，就開門請進，任由 King 狂揍猛打後，King 就醉倒在 Fredi 的家中，瞓著了。
案件既結，基層工人心中正為自己居然會扯上如此鬧劇而嘖嘖稱奇，電話又響起︰
「你好，我想問民事追討的。我個女同佢男朋友結唔成婚，佢話個男人對唔住佢，我想向個男人追返借畀佢那五十萬 ……」
沒有留言:
張貼留言